028 Marvin A - Glacier Bay History - Original.txt

{Number = 028}
{Type = Original}
{Title = Sítʼ Ḵaa Ḵáx̱ Kana.áa / Glacier Bay History}
{Author = Ḵooteen / Amy Marvin}
{Clan = Chookaneidí; Tʼaḵdeintaan yádi}
{Source = D&D 1987: 260–291}
{Transcriber = Nora Dauenhauer}
{Orthography = RP}
{Dialect = Northern - Coastal - Hoonah}
{Page = 260}
1	Yáa yeedát aadéi g̱unéi sh kakḵwalnik yé
2	yáa yagiyee.
3	Haa,
4	shux’áaná,
5	aadéi yoo haa kudiyeigi yé
6	yá Glacier Bay.
7	Aadéi áx’ yoo haa kawdiyayi yé.
8	Haa x̱oodáx̱ áyá yá shatkátsk’u
9	Chookaneidí.
10	A áyá
11	ts’ítskw áyá
12	awsiwát.
13	Yéi duwasáakw
14	(tlax̱ ch’u short cut áyá oosáaych)
15	ts’ítskw.
16	Ts’ats’ée yoo áhé duwasáakw, yá
17	yei kwdzigéi
18	héen x̱ukát kanashínch.
19	A áyá
20	a k’wát’i áyá tle
21	tle a tóonáx̱ yóot wugoodí áyá; tle awsineix̱ yá shaatk’átsk’ooch.
22	Tle yéi a daayaḵáa nooch.
23	Tle a jikgwanaag̱í áwé yaak latséen.
24	Tle a jikgwanaag̱í áwé tle yéi ayanasḵéich,
{Page = 262}
25	“Tlél naali yéidei yoo i gútgooḵ.
26	Tlél naali yéidei yoo i gútgooḵ; ḵut kéi i gux̱las’ées.
27	Chookaneidí áyá uháan.
28	Chookaneidí áyá uháan; ḵut kéi i kḵwag̱éex’.
29	Tle ch’ayóok’,
30	tle ch’ayóok, haagú.”
31	Yá “Chookaneidí” tle du sháan tóonáx̱ neil yaawdig̱ích gíyá yá ts’ats’ée ḵu.aa.
32	Yáax’ áwé tle
33	tle du x̱áni ḵux̱koodayáaych tle.
34	Tle yéi áwé tle ash éex̱ toowadaa.
35	A áyá yá
36	áa wdzix̱eet,
37	áx’.
38	Tlákw woosh eetéex̱ yaa gasx̱ítch áx’.
39	Aag̱áa áyá
40	tle yéi s x̱’ayaḵá
41	“Chóoooooo-
42	kaneidí.”
43	Yaakw áa awusteení tle yéi has x̱’ayaḵá, “Chóoooo-
44	kaneidí.”
45	Has ḵ’asag̱óo nooch.
46	Ch’u yeedádidéi yei s x̱’ayaḵá.
47	A tsú aan haa x̱’éix̱ akdudliyáakw.
48	Yéi duwasaakw wé shaatk’átsk’u ḵwá Shkwáx̱’.
49	Shkwáx̱’
50	yéi áhé duwasáakw.
51	Hú áyá yá ts’ítskw awsiwát.
52	Haa.
53	Aadáx̱
54	k’e aadéi haa kandayáayi
55	aadéi át shushatin yé.
56	Yáax’ áyá
57	du éet ḵoowaháa
58	yá shaatk’.
59	Yées
60	yées
61	at t’éit dus.áa.
62	Yáa yagiyee yéi wduwasáakw teenager.
63	Ax̱ áyá wsitee yá shaatk’.
64	Kaasteen.
{Page = 264}
65	Aag̱áa áyá
66	dus.áa.
67	Tlél yú neil.
68	Tle yá hít
69	tóonáx̱ áwé.
70	Eet ḵux̱dusteech.
71	Yáa yeedadi ḵusteeyí yáx̱ áyú at yatee.
72	Tlél yú neilnax̱.áa kawuhá yú yéi kawdiyayi ḵáa.
73	Tle yá hít tóonáx̱ áwé
74	du daakahídi dulyeix̱ch.
75	Aag̱áa áwé
76	ḵuwduwa.éex’.
77	Ḵuwduwa.éex’ áwé yoo at kuwateek.
78	Aadéi áwé tle hóoch’
79	tle ldakát ḵu.éex’dei yaa ḵukandak’ít’.
80	Yá shaatk’ du tláa ḵu.aa áwé
81	tle ash x̱ánt uwagút.
82	G̱aat yuwaax̱’éeshi áwé tle ash jeet yéi awsinéi.
83	“Ná.”
84	Yá shaatk’átsk’u ḵwá gwál nas’gidooshú táakw yá shaatk’átsk’u.
85	Ayá du tláa du éex̱ tuwsitee tlél du tuwáa ushgú.
86	Tlél public-déi ḵaa yátx’i yóo jidul.átgin
87	aag̱áa yú gaaw
88	woosh yáa awudané kát.
89	Aadéi at téeyi yé.
90	Tlél ḵaa yátx’i
91	ch’a baby tsú tlél át yóo koodujélk.
92	Awé du séek’ éex̱ áwé tuwsitee yá shaawát.
93	A áwe
94	da.áak.
95	Du da.aagí daak aawatán.
96	Da.áak.
97	Hóoch’! Tlél ḵoodaḵáatk’.
98	Awé tle yá shaawátx̱ wusiteeyi aa x̱ándei áwé wjixeex yá shaatk’átsk’u ḵu.aa.
99	Tle a x̱ánt ishḵáḵ.
100	Ax̱á wé atx̱’éeshi.
101	Wé Kaasteen.
102	Alwáal’ .
103	Ch’a yák’udáx̱ áwé yíndei yóo wdzigeet.
104	Aag̱áa áwé tle kéi ashoowa.áx̱.
105	Tle yáanáx̱ áwé alshát yú.á wé atx̱’éeshi.
{Page = 266}
106	Tle yéi áwé áa yaa yawdzi.aa.
107	Tle aadéi yaa akananik yé áyú yú shaatk’átsk’u du tláa een.
108	“Néi!
109	Sít’!
110	Geis, geis, geis, geis, geis.
111	Néi!
112	Sít’!
113	Geis, geis, geis, geis, geis, geis.
114	Néi!
115	Sít’!
116	Geis, geis, geis, geis, geis!”
117	Tle áx̱ áwé ashoowa.aax̱.
118	Tle du yáa ḵut wunei yu shaatk’átsk’u.
119	Ach áwé t1e wdigoot; tle du tlaa x̱áni daaḵ wujixíx.
120	“Atléi!
121	Waa sáyú x̱’ayaḵá?”
122	‘Néi!
123	Sít’!
124	Geis geis geis.’
125	Tle nas’gidahéen yéi yawaḵaa.
126	Atléi!
127	Nas’gidahéen tle yéi yaawaḵaa.”
128	“Dáa! Júk!
129	Ldakát yéidei yaa yagaḵéich,”
130	tle yóo áwé ayawsiḵaa du séek’.
131	Yá shaawát áyá wítless-x̱ wusitee.
132	Yá du séek’ teen neilí wuḵeiyi shaawát áyá wítless-x̱ wusitee
133	du daat
134	yá Kaasteen daat.
135	Ach áyá
136	ch’u shóogu áx̱ yaa ktoonikji yé.
137	Tlél ch’a yeisú.
138	Ayá wóosht kawdujeil yá sh kalneek.
139	Tle aadéi yaa kandulnik yé áyá.
140	Ax̱ léelk’w,
141	ax̱ tláa,
142	ax̱ éesh,
143	tle has wuwáadi áyá ḵutx̱ has shoowaxeex.
144	Ach áyá tlél
145	a wanáakx̱ áyá yaa koonax̱laník ax̱ toowóoch;
{Page = 268}
146	ḵunáx̱ ayáx̱ áyá yaa kanax̱ianík.
147	Aag̱áa áwé
148	tlél yú dikéenáx̱ áwé g̱unayéi shayawuxaash yá t’éex’.
149	Diyéenáx̱ áwé,
150	diyéenáx̱ áwé g̱unayéi yawdig̱ích.
151	Ach áwé tlél wuduskú.
152	Hél aadóoch sá wuskú.
153	Tle ch’a yák’wdax̱ áwé yá a kát aawa.aadi aa aan
154	a kat’óott uwagás’.
155	Wáa sáyá tle kawdzinét yá aan?
156	Wáa sáyá?
157	Yoo aan ka.áx̱ áwé tle wduwajee; tlél yéi ḵooshtú.
158	Tsu a yinaadéi aa,
159	tsu a yinaadéi aa.
1óo	Wáa sáyá tlél tliyéi yéi uteex̱.
161	Tle ásíwéi gé, tle tiáakw ásíwéi gé woosh t’ikaadéi yaa yandag̱ích yá t’éex’.
162	Ach áwé déi
163	woosh x̱ánt wuduwa.át.
164	“Wáa sáyá at kawdiyaa?
165	Cha ch’a tiéix’ dahéen x̱aa yá.
166	Wáa sáyá?
167	Tléik’ á,
168	tlé yoo aan ka.á gwáa yáa gé?
169	Tle ch’as a tóodei áyá yaa aa natéen.”
170	Tle tsu tlél yéi ḵuwustóo.
171	Tle tsu yéi woonei.
172	Yáax’ áwé tsá déi, yéi yaawaḵaa wé shaawát,
173	“Aatlein át áwé! Yú eetkát aa aa áwé.
174	Yú atx̱’éeshi teen akaawageis.”
175	Goot’á sáwé sít’ áwu á?
176	Tlél sít’ aadéi duteen.
177	A áwé a saayí a jeet aawatée yá kaasteench ḵu.aa; yú “sít’” yóo aawasaa.
178	Daa sáyú yéi ayasáakw?
179	Yéi gugéink’ áwé áx̱ wulixáat’i át áwé.
180	Awé tle saa a jeet aawatée.
181	Ach áwé tle yaa ḵoosgéix’i ḵwá tle woosh x̱ánt wudi.át.
182	“Oh!
183	Tlél ásíwé á yáx̱ yawuḵaa.”
184	Daa wlig̱aasi ḵáa x̱á,
{Page = 270}
185	daa sá mistake-déin awsinei,
186	tlél áyáx̱ utí.
187	Tle yéi áwé,
188	tle yéi áwé
189	tle woosh x̱áng̱aa wduwa.aat.
190	Oh, x̱’ayaaḵuwdlig̱át ásíwé
191	mistake-déin ásíwé yóot x̱’awditán a daax’.
192	Haahá.
193	Tle woosh kanax̱ áwé kéi ḵukdak’ít’ch.
194	Tle woosh kanax̱ áwé kéi ḵukdak’ít’ch.
195	Yax̱ at g̱akú dawóotl yáx̱ yaa at nanein ḵaa aaní áwé; ḵaa neilí áwé át aḵéen.
196	Awé a káa yaa at kandaxíl’.
197	Tle tlél yei ushtú wé shaawát ḵu.a.
198	Tle gíyáa du tóodei de yaa nagút ch’a tlákw.
199	Du káx̱ áyú,
200	du káx̱ áyú yéi yan kawdiyáa yú sít’.
201	Aadéi aawax̱oox̱u yé yáx̱.
202	Yáax’ áwé yéi ḵuyaawaḵaa,
203	“X̱’ayaaḵuwdlig̱át ásíwé.
204	Góok,
205	at gax̱duxoon dé yáadáx̱.”
206	Tlél áwé gaa yaa unashtéen.
207	Ch’u tle yándei yóo aa sixíxk de, wé hít
208	aadéi kei latsinji yé; yú
	( Slap! )
209	woosh t’ikaadéi
210	dag̱atji yáx̱ ḵuwanóok.
	( Slap! )
211	Yú t’éex’ aadéi, aadéi litseeni yé.
212	Tle áwé tle wdudzikóo.
213	Yá t’éex’ch ásíwéi gé yaa ḵukanashít’ gé.
214	Yaa akanalshít’ áwé; yá aan áwé yaa akanalshít’.
215	Aag̱áa áwé yéi ḵuyaawaḵaa, “Góok! Góok! Góok! Góok!
216	Góok!
217	Naa gax̱lagáas’i dé.
218	Góok!
219	Naa gax̱lagáas’.
220	Tlél áyá g̱aa wushtee.
221	Tlél áyá g̱aa wushtee.”
222	Aag̱áa áwé tle yéi ḵuyaawaḵaa.
223	“Góok, at gax̱tooxoon.
{Page = 272}
224	Hú tsú,
225	g̱aa yatee wé x̱’ayaaḵuwdlig̱adi aa; g̱aa yatee
226	yaax̱ g̱aag̱agoot!
227	Yaax̱ g̱aag̱agoot."
228	Woosh daa tuwudzinóokw x̱á.
229	Hél aadéi áa jeex̱duwanaag̱i yé; yées shaawát áwé,
230	yées shaatk’.
231	Aaa, yax̱ at g̱waku, "at x’aakeidí sákw áwé, dus.áa."
232	Awé yéi yan kawdiyáa.
233	Aag̱áa áwé tle yéi ḵuyaawaḵaa
234	"Ha ch’a tlél wáa sá utí yaax̱ wugoodí.
235	Yaax̱ g̱aag̱agoot."
236	Ach áwé tle x̱’awduwawóos’, ch’a yóonáx̱.
237	"Dé kéi at gax̱duxóon áyá.
238	Góok,
239	i daa.ádi k’idéin.
240	K’idéin.”
241	“Tléik’,
242	tlél yaax̱ yéi kḵwagoot.”
243	Tláw’!
244	Tláakw áwé kée yóo x̱’eiwanei.
245	“ ‘Tlél yaax̱ yéi kg̱wagoot,’ yú.á wé x̱’ayaaḵuwdlig̱adi aa.
246	Tlél du tuwáa ushgú yaax̱ wugoodi yú.á.”
247	Haahá!
248	Tle g̱uneitkanaayéet shuwjix̱ín.
249	“Wéit’aa du aat aadéi ng̱agoodí
250	du aat; góok, góok, góok.”
251	Héináx̱.á ḵwá at wuduwaxoon; x̱’óol’ yáx̱ at yatee de.
252	Tle tlákw áyá kawdzinét,
253	tlákw áwé kawdzinét; adawóotl yáx̱ at yatee de.
254	Yeedadi aayí óoxjaa yáx̱ gíyú.
255	Tle kulix̱éitishán aadéi yaa kanaxat yé.
256	A sóox̱ áwé.
257	“Aaa, yóo kawuhaayí, ḵa yóo kudayéini kálk’w
258	ax̱ éek’ sée
259	yóo kudayéini, ha
2óo	góok
261	at gaxoon,
262	at gaxoon!
263	Eesháan i tláa i éesh eesháan.”
{Page = 274}
264	Du een yoo x̱’adudli.átk.
265	“Tléik’!
266	Tléik’!
267	Tlél yaax̱ yéi kḵwagoot.
268	Tlél yaax̱ yéi kḵwagoot.
269	Ch’a wáa yeikuwáat’dei sáyá
270	ax̱ yáa yéi kg̱watée yá aadéi yax̱waaḵaayi yé.”
271	Tlél oosháaḵ.
272	“Ch’a wáa yeikuwáat’dei sáyá ax̱ yáa yéi kg̱watée.
273	Aadéi yax̱waaḵaayi yé; ách áwé
274	tlél yaax̱ yéi kḵwagoot; tlél yéi kg̱watée.”
275	Ach áwé déi du x̱’ayáax̱ ḵaa taawahaa.
276	Ach áwé yei ḵuyaawaḵaa
277	“Góok!
278	Yáat’át ḵu.aa déi
279	du x̱ándei.
280	Hél aadéi ch’a yéi jix̱duwanaag̱i yé.
281	Aaa,
282	góok!”
283	Tle gunayéi yaawaxíx.
284	Daa sáyá yatsáagu yáx̱ yateeyi át áwé,
285	aan du x̱ándei g̱unayéi aawa.át
286	du aat hás
287	ldakát
288	tle yá uhaan hás teen
289	du x̱ándei
290	du atx̱aayí sákw.
291	“Kaasteen x̱’éidei!
292	Kaasteen x̱’éidei!”
293	Tle yéi áwé
294	daa sáyá
295	ash g̱walit’áayi át.
296	Yá daa sá dujáḵx̱i tle dusxóok
297	yá a doogú.
298	Tle x’óowx̱ dax̱dulyéix̱.
299	Tle á áwé tle; “Kaasteen kaadéi!
300	(Kaasteen kaadéi!)
301	Kaasteen x̱’éidei!
302	Kaasteen x̱’éidei!
303	Kaasteen kaadéi!”
304	Tle yéi áwé.
305	tle du náḵ ayadu.átx̱ tle.
306	Haa,
{Page = 276}
307	ach áwé tle ḵaa x̱’éi yéi wootee
308	tle ch’a wáa yeikuwáat’dei sáyá ḵaa x̱’éi yéi yatee
309	ḵaa toowú asinóogu ḵáa tle du kaadéi at dujáḵx̱.
310	Cha ch’a a ítdáx̱ tsá ḵaa toowú kei klatseench.
311	Ḵa “du x̱’éidei," yóo tsú yoo ḵuwaaḵéik.
312	Cha ch’a du x̱’éidáx̱ áwé tsá g̱oot aa naa jeex̱ dutee
313	du x̱’éit ḵux̱da.oot.
314	Aag̱áa áwé du x̱’éit ḵooda.óowch
315	yá ḵaa toowú asinéegu ḵaa x̱ooní.
316	Yú guneitkanaayéech gawdasháadi áwé hóoch tsú tle ax̱á.
317	Ach áyá “ḵoo.éex’” yóo at tuwasáakw.
318	Ḵoo.éex’ ya yagaxíxch
319	haa toowú neegu sh tóodáx̱ kei x̱tudateeyít.
320	Cha ch’a yóo guneitkanaayí jeet wuteeyí
321	yá, daa sá yan wutuwashadi át,
322	cha ch’a hú du x̱’éit ḵuwda.oowu wtusakoowu; cha ch’a á áwé tsá haa tuwunáagux̱ yaa ksateech.
323	Du éenax̱
324	yá Kaasteen.
325	Ḵa daa sá wtuwajag̱í át
326	ha Kaasteen kaadéi
327	guneitkanaayí jeet wutooteeyí,
328	cha ch’a a ítdáx̱ tsá haa toowóo kéi latseench.
329	A náagux̱ áwé sitee, haa tuwunáagu.
330	Yá aadéi yoo kawdiyayi yé yá Kaasteen; áyá ḵaa ée at wulitúw.
331	Aadáx̱ áwé ldakát du kát kawduwajél.
332	Aaa.
333	Yáax’ áwé.
334	Hóoch’.
335	De yaagú yíndei yaa ḵukandagéin.
336	Aag̱áa áwé du tóox̱ kei at uwaxíx Shaawatséek’.
337	Aaa.
338	De woowáat.
339	Ax̱ yáanáx̱ áwé de woowáat aag̱áa.
340	"Likoodzí kwshá!”
341	Gunéi uwagút.
342	Aaa.
343	Dé du náḵ ayagux̱da.at aa du x̱oonx’í áwé át náḵ
344	wé a yeex’ du náḵ akg̱wa.at hídi.
345	Aag̱áa áwé tle héidei kéi ashoowax̱ích.
{Page = 278}
346	Aaa.
347	“Yee eetítdei ágé yaa kḵwadax̱éet,
348	ax̱ éek’ hás?
349	Yaax̱ g̱aysagú wé Kaasteen ḵwa.
350	Yaax̱ g̱aysagú.
351	X̱át ḵwá du eetéex’.
352	Tlákw áyá naná
353	shux̱sitee.
354	Ach áwé x̱át ḵwa du eetéex’.
355	Aaa.
356	Yaax̱ g̱aagag̱oot.
357	Yaax̱ g̱aagag̱oot.”
358	Aag̱áa áwé tle tsu salagaawdéin yóot x̱’awditán Kaasteen.
359	“Tlél yaax̱ yéi kḵwagoot.
3óo	Yéi yax̱waaḵaa tlél yaax̱ yéi kḵwagoot.
361	Ch’a yáa yéi x̱at gug̱atée.”
362	Yéi áwé.
363	Tlél ayawudlaaḵ tsu.
364	Haa,
365	hóoch’ áwé.
366	De áx’ áwé ḵaa taawlixaach.
367	That’s the last one áyá
368	Shaawatséek’ du x̱ánt wugoodí.
369	Ach áwé
370	du x̱ándáx̱ yóot aawa.át.
371	De g̱aa áwé kaawagei.
372	Yax̱ atg̱wakú
373	naaléi át wudig̱adi yé
374	du aat hás jeedáx̱
375	du sani hás jeedáx̱,
376	du tlaa hás jeedáx̱
377	atx̱á.
378	Tlélí yú hít shawuheegí yáx̱ áyú du jeet at wuduwatée.
379	Aag̱áa wé tsáa
380	yaakwdéi ḵukawdik’éet’.
381	Aaa.
382	Tléil tle yóot yawugú du náḵ.
383	Wé yaakw yée yan aḵée áwé
384	ch’a awsigooḵ.
385	Tle ch’a yá at gaxoon tóox’ ásíwé du sháan tóo yéi ḵuwanéekw wé Ḵaanax̱duwóos’ ḵwá yá shí.
{Page = 280}
386	Du sháan tóo yéi ḵuwanéekw.
387	Awsikóo tsú
388	du eeg̱áa áa yoo a.átgi.
389	Ha.
390	Tléik’, áa yan wujiḵáḵ yú hít yee.
391	Ch’a yá deikéet awusgoog̱ú áwé
392	tle wdudziteen.
393	Héidei áa yax̱ wusixíx.
394	Tle ḵaa x̱’éinax̱ yóot uwaxíx
395	“Héidei áa yax̱ wusixíx!”
396	Tl’aadéin áwé kei wsixíx s’é,
397	du een wé hít.
398	Aaa.
399	Aag̱áa wé ḵaa tláa áwé kadag̱áax̱.
400	Kawdig̱aax̱.
401	Yá Kaasteen du tláa áwé kawdig̱aax̱.
402	Aaa.
403	Tle du x̱’éidáx̱ áwé
404	wé sháa tsú kawdzig̱aax̱.
405	Ch’u l ák’ has ooheení áwé tle yíndei yei yanasx’út’,
406	wé a yeet aa hít
407	de yíndei áwé.
408	Naaléi áyú aax̱ duwa.ax̱ji yé
409	yu ḵaa sé.
410	Aadéi g̱ax̱dusti yé.
411	Hél tsu latseen ḵoostí.
412	Yaa yeedát áwé tlél,
413	tlél yá naná.
414	Daa sáwé héidei wooxeex.
415	Aag̱áa ḵu.aa ch’u t’ukanéiyi
416	wáa sá wuneiyí ch’u tle yax̱ yaa ḵuwaklajáḵch wé toowóo néekw.
417	Aadéi woosh goonée ḵuditeeyi yé.
418	Aadéi kwdayen yé.
419	Aaa, ách áwé yaakwnáx̱ wudihaan.
420	Ch’a ḵaa sé duwa.áx̱ch.
421	Ch’a kadusg̱áax̱.
422	Tle ḵaa waḵshiyeex’ áwé yóo kuwateek
423	yíndei nasxéex wé hít.
{Page = 282}
424	Aag̱áa áwé kéi akaawashée tle.
{Comment = D&D1987 breaks from the original line numbering during each of the two songs in this text, and continues with the original numbering after the end of each song. However, in the corpus, the line numbering simply continues through each song, treating them as lines of data. Thus, there is a discrepancy of 22 lines between D&D1987 and the corpus starting at the end of the first song.}
{Comment = First song, vocables.}
425	Ahaa haa hei hei
426	ahaa haaa hei heiiiiy
427	ahaa haa hei heiiiiy
428	aa haa hei hei
429	ahaa haa hei hi.aa
{Comment = First song, first verse.}
430	Ishaan gushei hei
431	ax̱ hidi hee
432	ishaan gushei hei
433	ax̱ hidi hee
434	dinaḵ yaa kx̱aagoot, aa
435	hee hee aahaaa
436	hee hee aaa
437	ahaa, haaa hei hei hi.aa haa
{Comment = Note says "repeat first verse and vocables".}
{Comment = First song, second verse.}
438	Ishaan gushei hei
439	ax̱ aani hei
440	ishaan gushei hei
441	ax̱ aani hei
442	dinaḵ yaa kx̱aaḵoox̱ aa
443	hee hee aahaaa
444	hee hee aaa
445	ahaa, haa, hei, hei, hi, aaa
{Comment = Note says "repeat second verse and vocables".}
446	hooooo, hoo, hoo.
{Comment = End of first song. 22-line discrepancy from D&D1987 begins here.}
447	Haa, aadéi yoo s kawdiyayi yé áyá.
448	Aadéi s wooteeyi ye áyá.
449	Haa.
450	Aag̱áa yéig̱aa shí áyá,
451	ya Kaasteen du náḵ yóot ḵuyawugoowú.
452	Yá hít du daakeidí yáx̱ yan kawdiyáa,
453	yá Chookaneidí hídi.
454	Du een yá héen takaadéi nasxéex ḵaa waḵkáax’.
{Page = 284}
455	Ách áyá hítt ashoowatán,
456	shux’aanáx̱ kei akashée,
457	yá shí.
458	"Isháan gushé ax̱ hídi,"
459	yóo yaawakaa.
460	Aaa.
461	Du náḵ yóot yagóo ḵu.as, "ishaan gushei ax̱ aani."
462	Aaa.
463	Tlél kwshá tle tléix’ wóosht wul.aat
464	yá at wulyaaḵw.
465	Yá daatoowú yanéegu,
466	has du x̱ooní,
467	yá shaawát,
468	has du waḵshiyeex’ yóo kootée,
469	aaa, hél tsu aadóo sá shí du tóo yéi wunei.
470	Ts’as akdudlix̱éitl’ áyú.
471	Ch’as sh wuduwatáat áyú aadéi ḵoog̱ag̱aneix̱i yé yáx̱,
472	because tlax̱ a yáanáx̱ áyú yatee yú aan aadéi kawdzinéidi yé.
473	Tlél ch’a utí.
474	Ách ayú ldakát akdudlix̱éitl’.
475	Ch’a aan áyá yá shí du tóo yéi woonei.
476	Aaa.
477	Ách áyá for everlasting tsu ax̱ eetéex̱ yaa kana.éin aa.
478	Has du jiyís recorded-x̱ yaa nx̱alayéx̱,
479	has ax̱sakóowoot waa náx sá ḵuwusteeyí yá shí.
480	Tlél ḵwás ḵáa du een
481	sh yawusḵaa.
482	Ch’a yáa yeedat x̱áng̱aa ḵwás yéi yaa kanduník ḵáa.
483	No!
484	Tléik’!
485	Haa,
486	aadéi kakḵwalanéek tsú
487	á ḵu.aa yáat’aa,
488	ách yéi kawduwaneegi át.
489	Aadáx̱ áwé
490	Wanachích t’iká
491	yéi x̱waajée.
492	A t’ikáa woogóo áwé
493	yaakwnáx̱ wudihaan tau haa
494	aaa,
495	tsu haa x̱ooní,
{Page = 286}
496	Chookaneidí,
497	Sdayáat.
498	Hú áwé tsu yéi yaawaḵaa
499	"Tleiyéix’ s’é,
500	tleiyéix’ s’é."
501	Ách áwé tle tliyéi yéi wootee wé yaa yanagwen yaakw; aaa.
502	"X̱át tsú,
503	ax̱ tundatáani
504	tlél aadéi
505	yóodei koonax̱dyaayi yé.
506	X̱át tsú ax̱ toowóo aadéi yateeyi yé
507	ax̱ x̱’éináx̱ yóot g̱as.aax̱."
508	Tle áwé awsigooḵ; ldakát wé yaakwx’ áwé awisgooḵ.
509	Aag̱áa áwé du tóo yéi wooneiyi shí áwé tle kei akaawashée.
510	Aaa.
{Comment = See comment after line 424. The second song is also 22 lines long, and thus there is a discrepancy of 44 lines between D&D1987 and the corpus after the second song.}
{Comment = Second song, vocables.}
511	Ahaa haa aaa haa
512	hei hei aaa hei hei
513	ahaa haaa aaa haa
514	yei hei hayoo
515	aaa yei hei
516	aaa haa haa
{Comment = Second song, first verse.}
517	Ax̱ aani hee
518	gushei hei aaa haa
519	ch’al guḵateen aa
520	shei aanaa haa hayoo
521	aahaa yei hei hei hayoo
522	aanaa aaa haa haa
523	haa haa yei hei hayoo
524	aahaa haa haa haa.
{Comment = Note says "repeat first verse and vocables".}
{Comment = Second song, second verse.}
525	Ax̱ hidi hee
526	gushei ei aa haa
{Page = 288}
527	ch’al guḵateen aa
528	shei aanaa hayoo
529	aahaa yei hei hei hayoo
530	aanaa aaa haa
{Comment = Note says "repeat second verse and vocables".}
531	a haa haa haa
532	hooooo hoo hoo.
{Comment = End of second song. 44-line discrepancy from D&D1987 begins here.}
533	Haa, Sdayáat aayí áyá.
534	Aaa.
535	Yéi áyá dáx̱náx̱ áyá shí has awliyéx̱
536	yá at kandaxéel’.
537	Haa.
538	Hél ch’a koogéiyi a náḵ yaa s woonagwéin.
539	Haa,
540	tsu ch’a yá T’aḵdeintaan
541	tsu hél sh tóot has ḵuwdashí
542	ḵa yá Kaagwaantaan
543	ḵa yá Wooshkeetaan.
544	Ch’u tlei yéi yaa ḵuwanagwéin.
545	Ch’as hás áyá yá s du toowú néegu s du x̱’éinax̱ kíndei yóo woonei.
546	Tlél ch’a koogéiyi a náḵ yóodei has yawugoo tle.
547	Haa.
548	Aag̱áa áyá tsá gunayéi yaawagóo.
549	Wooshkeetaan áwé
550	yá Excursion Inlet yóo duwasáakw yeedát,
551	aadéi áwé yan yaawagóo.
552	Kaagwaantaan ḵu.aa áwé s
553	yáa yá Ground Hog Bay,
554	Kax’noowú
555	yéi gíyá sh disáakw.
556	Á áyá aadéi áyá yan yaawagóo hás ḵu.aa yá Kaagwaantaan aayí.
557	Uháan ḵu.aa wé tle tsú g̱unayéi haa yaawagóo s du dakádin.
558	Laḵoox̱as’t’aakhéen.
559	Yáadu á.
{Page = 290}
560	Yá at shasatéen; ch’u yeedát áwé á; yá Frank Norten-ch aanx̱ wuliyex̱,
561	yá g̱eey yáx̱ yateeyi yé.
562	Tle á áyá, héeni wtuwa.aat.
563	Haa
564	lisaagée x̱á yaakw yík.
565	Aag̱áa áyá áx’ héeni aawa.aat; tle áyá tle
566	chush ya.áak yéi wdudzinei tle,
567	Spasski.
568	Laḵoox̱as’t’aakhéen yéi duwasáakw.
569	Tle á áyá tle áx’ héeni has woo.aat.
570	Haa yax̱ at g̱wakú
571	adawóotl kayáx̱ at yatee.
572	Tlél daa sá ḵoostí.
573	Tle yéi áyá.